كلمات اغنية ياظلام الليل الوليد ال عامر
العفيف اللي ترجّل عن جواده وش بقاله
غير بيتٍ عنده الفاهي ليا عرّض تنَبّه
شاعرٍ لو ينكر انّه عاشقك حتى الثماله
تفضحه بعض القصايد والرسوم المشلهبّه
هو عيوف خاطره طايب ووقته ما صفاله
عيبه الماخوذ حسّاس ولبس للوقت جبّه
ياظلام الليل وش عندك من أبواب العداله
وانته ابعد ماتكون من العداله والمحبّه
تحسب ان قلوبنا مثل الصحون ام الفواله
وتحسب ان ضلوعنا مثل الحطب حتى تشبه
ما بقاموسك محلٍّ للوفى ولّا الجماله
فيك حتى الطير ما يلقى ليا من جاع حبّه
ليه تستنزف مشاعرنا ومن باب الجهاله
وانت ما عندك علينا يا ظلام الليل سبّه
وش تبي فاللي مشَاك وتحسب انه كان داله
كم سراك وكم سبح في طيّتك تسعين غبّه
في يمينه كن مسباحه غدى خيرة عياله
في عيونه ماهو بشيٍ ليا هوجس لَعبّه
وكم سهر بك راس ماله غترته مدري عقاله
مع شموخن يكمن الإيثار في قشره ولبّه
كم تمثنا جوك البارد وهو جالس لحاله
بليلةٍ فيها القمر وايق وذعذاعك يهبّه
وكم لقاله فيك رجمن يتعب الراقي مطاله
وارتقاه وطاح من عينه كثير من الاحبه
وانت ياللي كنك اصحاب الفخامه والجلاله
ادري ان شوفك حرام وغيبتي لك مستحَبه
تدري ان مغليك غاب وراح من طيبه وفاله
ليه تنشد عقب ذاك الوقت يوم الريع ذبه
زرفلَن هجنه من البارح على درب ارتحاله
مطوّحن راعيّها بالصوت مافيها مغَبّه
قد عطاك من الوفى اللي يصطفق جاله بجاله
لو تلاقي ربعه بذا الوقت والله ما تكبّه
بس ذاك اول قبل يدرع يقينه باحتماله
يوم هو والله غشيم ويوم للأيام خبّه
ليه تنشد يوم صارت حالته في الوقت حاله
جيّتك لأمن بغيت الصدق والله ما تشبه
غير في عودٍ براه الوقت وأسرف في محاله
ما تفيده مزنتن من مطلع القبله تصبّه
كنت لك فارس ومن قومٍ عمامه هم خواله
ممتطي لك صهوة اللي ما يوصفّها المشبّه
من بنات الريح وأطيب ما يجيبنّ السلاله
ما يعرّضها على السوّام لو سومه كسبّه
وطحت من دونك صويب وطيحتي فيها شكاله
طحت والعدوان حولي وانت نبّ العلم نبّه
المحزّم ماعليه من الهلايم والحثالة
تدري انه ما يدقّق في المديح وفي المسبَّه
ويش ابي بك يوم طبت ابشرك عدّت سهاله
وانت يوم الحال ينزف باخلٍ تعطيه طبه
لا تساوم مثل هذا في وفاه وراس ماله
صعب تلقالك جواب ويمكن اسهل تستتبه