كلمات اغنية سل روحك - عبدالله ال فروان وعمر بن عضيب
مرني ليلٍ بدونك غير عن باقي الليالي
كنه اول ليلٍ يحاصرني من اربع جهاته
غاب نورك وانسرق من صحبتي حتى ظلالي
لين هذرى دمعٍ ابطى ما تحرر من سكاته
سلّ روحك يا حبيبي ولّا انا مانيب سالي
انت في بالٍ تفاصيلك تلطّف ذكرياته
لو تفارق واقعي ما ودي تفارق خيالي
ودي ان قلبي يعيش اللي ما عاشه في حياته
بعدك الضحكه لها حالٍ سقيم وثوب بالي
ضحكة اللي ما يبي هزيمته تربك ثباته
ارسم الفرحه على وجهٍ من الامال خالي
والفرح على بساط الحزن حزن بحد ذاته
ادري ان لحظة فراقك فوق صبري واحتمالي
بس انا فوق انتباه الحاقد وعين الشماته
مستحيل ترجّع الدنيا مكانة شخص غالي
ساعة انه طاح من عيني مثل ساعة وفاته
لا انتهى عمر الغلا واقفت عن ديارك رحالي
لك يمينٍ بالله اني ما اتنازل بإلتفاته
صدة الخذلان ما فيها غرور ولا تعالي
يتجرّع مُرّها اللي حبّك بكل استماته
هارب من الكلمه اللي لو قدرت تقولها لي
وين ابلقى كلمةٍ تبعث شعوري من رفاته
ودي أرحل فالحياه الباقيه وأبقى لحالي
قبل اصير الميّت اللي ما يعزّى في مماته