كلمات أغنية عالية نجد - فايز الدوسري
يا عالية نجد وين مروضين الخيوليوم المساري على السبع ونجم الجدي
البدو شدو على بنت الفرس والذلول
ما عاد يلقون في اطراف المرابع مدي
يا وجد روحي بعد مرت ثلاثين حول
على اول العمر يوم اني بعمر ولدي
اعيش لي حرب ما ترحم كبار العقول
الها اربع سنين عيّت تستوي وتهدي
لولاي اكافح بقال الله وقال الرسول
يمديني اشيل عقلي فوق راحت يدي
انا معي خشية مطوع وقلب مهبول
تومي به الريح في شمس الضحى ويغدي
لا قلت خلك على وجهك يا راع الرحول
قال الرسن في يدينك وانت شوفك قدي
لكن علي الحرام من الرضا والقبول
اني ما كب المبادي لو يطيح سعدي
حنا رياجيل ما نقبل بأقل الحلول
الطيب نقول طيب ما نقول اجودي
واليا بغا هم طلّاع الثنايا يطول
كم فارسٍ مات قبلي في الهوى وبعدي
يا مركب الشام لا تشكل عليك الحمول
وش لون شامي صناعه والبساط احمدي
عبرت شط الفرات ولا عبرت السيول
حتى بلغت المرام العفوي العسجدي
خل الاساطيل واقليم البحر والميول
مرساك في ساحل احلامي ورمل بلدي
احي العروق القديمه والعوارض تزول
واذبح همومي مثل ما يذبحون الفدي
وان جبت سبع العجايب بين الاربع فصول
اشدّ كفك على كفي واقول بعدي
عليك حتى سراجيف الظماير تصول
تستظهر الشاعر المبدع من المبتدي
بين البها والدها والغطرسه والذهول
والانتماء واللمى والمارد القرهدي
صفراً من الخيل مافيها ثلاثة حجول
فيها من امجاد اهلها كل مجد يحدي
اليا اقبلت والهبوب مناطحتها تجول
الوجه ماله لدي والعود ماله لدي
مدري نحرها على الخصر النحيل معزول
والا تلحّف تبا صلف الهبوب تهدي
مشي المقيد وعين اللي كسر للنزول
لا بعثر الريش والخرب الجسيم مهدي
واللعب لعب شعلاً تشعا زبون الفعول
تقول تاطا تحت حرش الخفاف بردي
وان هوبل القرم والزعجول الاول عجول
خطراً على دربها راع الرحول يغدي
هذي على شانها نخلي سروج الخيول
ويعود الشيخ راعي والمردد ردي
فيها من الزين ما يعمي عيون النظول
ومن التفكّر بخلق الله للمهتدي
شومي لنا يا سلايل مفحمين الزحول
لو الحوادث تعجن المرتبه والبدي
خلي ذوات الخدور وباهيات الفضول
اللي من الغي تبغا تقتدي تقتدي
حنا بلشنا معك في كل وصف مهيول
نكتب عن الصبح والا ليلك السرمدي
عيونك الخرس ما ندري وش اللي تقول
الجفن كنه يغني والرموش تحدي
اشوف فيها كحل واشوف فيها كحول
واشوف في ورد خدك كل وردٍ ندي
واشوف سلسالك اللي فوق جيدك تقول
جرة غزالٍ على طرق النفود يعدي
واشوف سلسالك اللي فوق جيدك تقول
جرة غزالٍ على طرق النفود يعدي