كلمات قصيدة بيعلق غلطاته على الحب لأول مرة

أنا عندي إيمان
إن كلامهم صح ومظبوط
وإني وأنا بعيد عنِك ميّت
وإني وأنا فقربك مش مبسوط
بيني وبينك مسافات أبعد من أي اتنين
كل اختياراتي اللي بدونك أفضل بكتير
لكن من امتى الحب بيبقى علاج
من امتى بياخد من الفايض يدي المحتاج
من بين أربعة مليار واحدة اخترتك
حبّيتك وكمان قدّرتك
والكلمة اللي بتخرج منك
أجمل من أي كلام مسموع
أشبع لو شفتك يوم صدفة
وان غبتي ليالي بموت من الجوع
قصر الموضوع إنك لعنة
وإن أنا ملعون
وان وجودك على قد ما طيّب مش مضمون
وان مكاسبي معاكي مجرد تمهيد لبعادك وخسارتي
لحظة ما الناس آمنت بيا انتي كفرتي
وبدال ما تكوني أمان من الناس
ومكان يفضالي ويسمعني
قررتي تكون زيادة خوف
ودراعي اللي تملي واجعني
وبقيتي العين اللي بتخدعني وبتبُص طشاش
أنا بتعاقب ليه على حبك
ديه حاجة الواحد ما اخترهاش
ملعون أبو قلبي اللي ندالك
واختار من دنيته وادالك
ملعون تركيزي في تفاصيلك
والظن اللي بييجي في بالك
ملعونة شوارع بتفّكر
ملعونة صوابع بتسكّر
ملعونة الروح اللي تبكّر
وتقوم من النوم تحلم بيكي
أقتلك ازاي
أفصلك ازاي عن خطواتي وظني وشكلي
حبيتك ليه وانتي مشاكلي وضربتي في الضهر
إديتك كل اللي مسبب فرحك
سيبتيلي اللي يحسس بالقهر
حبيتك ليه

وبشوفك مصدر أحلامي وفرحتي على إيه
ومصدق ليه إنك دنيا
وبفكر ليه في دخولي عليكي في بيت واحد
أنا أكبر أحلامي وجودك
والنبي شوفتي غباء في غبائي
أكبر أحلامي أفتّح عيني على حضورك
يا خي ابوه ده الحب اللي يخلي حضورك
كل أمالي
أنا زينة الناس
عم الرجالة في عين الكل
أجمل ستات في الدنيا اتمنوا سلام بالإيد
زيك خمسين مرة احتاروا يخشولي منين
على إيه بلاقيكي انتي جميعهم
أشتري فيكي يوماتي وأبيعهم
وافرشلك قلبي تعدي عليه
حبيتك ليه

ليكي حق تزيدي عليا دلال
وتحسي بروحك فايقة جمال
وتزيدي في غلطك ميت مرة
مش مضطرة صحيح تراضيني مش مضطرة
ولا مضطرة تقدمي كرامات للي في قلبك
الغلطة على التايه جوايا عشان حبك
ويا أفوق يا أهلَك
آه يا قلب يا كلب يا شاري سراب
ومضيّع في قلوب تستاهلك
حبيتك ليه

كلمات قصيدة بيعلق غلطاته على الحب لأول مرة - عمرو حسن

كلمات قصيدة بيعلق غلطاته على الحب لأول مرة

شاهد أيضاً